مجنون القلم (بقلمي)

موضوع: مجنون القلم (بقلمي) 2008-04-17, 21:35

قصتي ما يدري بيها الا القليل

مجنون الگلب ليهسه مامات

ومجنون القلم يكتب قصايد

عليله الروح من تنشدني عليك

تگول الجرح طگ او وسع زايد

اگلها انجبر واتلمس بالاعذار

تگلي انجبر لو دولاره صاعد؟

يا دولار انت شجاي تحچين !!!

عمامه الطـّلعوا كل حچي البايد

واظل انا الفقير بهيچي اوضاع

ايه انا الفقير والله شاهد

حسبالي على الفطره وحچي الزين

اثاري الصدگ ضاع ولا عوايد

هيچ بكل بساطه انصدگ بساع

وحفروا بير يمي وانا گاعد

تتهامز لسنهم وانا فرحان !!!

والم برويحتي وشعندي عايد

لميت الگدرته وگـرّب العيد

ورحت بالعيد متونس أعايد !!!

لگيت الدار وحشه من الاحباب

تصفر دارهم ما بيها واحد

تگول البارحه حظك غفه ونام

بين احضان الاعور والمجاهد

عنده منصب وعنده حراسات

وباركان القياده صار قائد

انت ما ألك منصب ولا جاه

اگعد واستچن وكون هايد

أحط ايدي على صدري ونار يا نار

تشب بيــه جهنم وانــا فاقد

شلون تريد من صابك يداويك !!

گام يحمي لجروحك حدايد

ليش انا بنظرهم شنهو سويت

غير بسنّــة الله وجيت رايــد ؟

وألك يالمدري اوصفك بيش ما بيش

لو حظي الفگر ذبني ويعاند

لاعدكم كرامه وچلمه بلسان

واليلزم الشارب ابن اماجد

واليلزم الشارب ماله ايخون !!

لو عالمادّه والدين راكــد

لا عدكم عدل لا عدكم انصاف

ندري الزلمه يوفي من يواعد ؟

يظل مجنون گلبي لهسه ما مات

وجسر ظل القلم يكتب قصائد